2Pe 3 | BOJ | STEP | O ijo was bole, e nami anjam neŋgreŋyosim niŋgi qa qariŋyem agi bini olo anjam qariŋyonum. E nuŋgo are tigeltetŋgitqa niŋgi iŋgi bole bole mondoŋ brantqas qaji deqa olo are qalqajqa deqa osim neŋgreŋyonum. Nami Qotei aqa medabu o qaji tamo naŋgi iŋgi deqa anjam palontoqnsib laqneb. Tamo Koba Yesus agi iga eleŋej qaji aqa dal anjam qa dego niŋgi are qalqajqa deqa e anjam endi neŋgreŋyonum. Dal anjam di Yesus aqa wau tamo naŋgi nami niŋgi qa bosib palontosib niŋgi merŋgeqnab quoqneb.

2 Peter 3

Bole, Tamo Koba Kristus a olo bqas

1 O ijo was bole, e nami anjam neŋgreŋyosim niŋgi qa qariŋyem agi bini olo anjam qariŋyonum. E nuŋgo are tigeltetŋgitqa niŋgi iŋgi bole bole mondoŋ brantqas qaji deqa olo are qalqajqa deqa osim neŋgreŋyonum. Nami Qotei aqa medabu o qaji tamo naŋgi iŋgi deqa anjam palontoqnsib laqneb. Tamo Koba Yesus agi iga eleŋej qaji aqa dal anjam qa dego niŋgi are qalqajqa deqa e anjam endi neŋgreŋyonum. Dal anjam di Yesus aqa wau tamo naŋgi nami niŋgi qa bosib palontosib niŋgi merŋgeqnab quoqneb.

3 Ariya ijo anjam kobaquja bei unu. E na niŋgi merŋgit poiŋgem. Mondoŋ diŋo bati jojomoqnimqa meqe meqem tamo naŋgi bosib naŋgo segi areqalo uge uge dauryosib misiliŋ anjam endegsib merŋgoqnqab, 4 “Qotei a nami marej, ‘Mondoŋ Kristus a olo bqas.’ Ariya a qabi unu? A bqa keresai. Niŋgi uniye. Gago moma utru naŋgi nami moreŋoqneb bosi bosiq agi bini iga degsi unum. Qotei a nami mandam atej agi bini mandam a degsi unu. Deqa Kristus a olo bqa keresai.” 5 O was qu, meqe meqem tamo naŋgi are bole ti sosai deqa naŋgi bosib anjam degsib merŋgoqnqab. Nami Qotei a anjam marnaqa laŋ brantej. A olo anjam marnaqa mandam a ya ambleq di brantej. 6 Mandam a ya ambleq di brantonaqa bunuqna Noa aqa bati qa Qotei a olo marnaqa ya koba dosiqa mandam ya maqosiqa iŋgi iŋgi kalil padaltej. 7 Ariya bini laŋ ti mandam ti tariŋoqnsib unub. Mondoŋ Qotei a olo anjam marimqa laŋ ti mandam ti ŋamyuo na yusib koboqab. Bati deqa Qotei na tamo naŋgi a qoreiyeqnub qaji naŋgo une qa peginjrsim naŋgi torei padaltnjrqas.

8 O ijo was bole, niŋgi ijo anjam bei endi geregere qusib olo are walŋgaiq. Qotei aqa areqalo agiende. Bati qujai a wausau 1,000 dego kere. Wausau 1,000 a bati qujai dego kere. Bati qujai ti wausau 1,000 ti naŋgi ombla kerekere. Qotei aqa areqalo agide. 9 Tamo qudei naŋgi endegsib mareqnub, “Tamo Koba Qotei aqa anjam nami marej qaji di a olo dauryqajqa tariŋoqnsiq laŋa sokobaiyeqnu.” Di sai. A na tamo naŋgi padaltnjrqajqa arearetosaieqnu. A na tamo kalil naŋgi are bulyqajqa marsiq deqa a jiŋga na niŋgi qa tariŋoqnsiq unu.

Mandam ti laŋ ti koboqab

10 Ariya diŋo bati brantimqa Tamo Koba Yesus a bajiŋ tamo bul urur boqujatqas. Bamqa bati deqa laŋ a poŋosim koboqas. Iŋgi iŋgi kalil dego ŋamyuo na tulaŋ kaŋkaŋam yusib koboqab. Deqa mandam ti aqa iŋgi iŋgi ti kalil olo bunu sqasai. 11 Ariya niŋgi are qaliye. Iŋgi iŋgi kalil degsi koboqas deqa niŋgi kumbra kie dauryqajqa merŋgwai? Niŋgi kumbra endegyiye. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye. 12 Osib nuŋgo kumbra dena niŋgi Qotei aqa bati koba brantim unqajqa deqa tariŋoqniye. Osib bati di urur brantqajqa deqa niŋgi siŋgila na wauoqniye. Bati di brantimqa laŋ a ŋamyuo na yusim koboqas. Mandam ti iŋgi iŋgi kalil Qotei na atej qaji de ti dego ŋamyuo na tulaŋ kaŋkaŋam yusib ya bulosib koboqab. 13 Ariya Qotei a nami endegsi marej, “E na laŋ bunuj ti mandam bunuj ti olo gereiyqai.” A degsi marej deqa iga di unqajqa tariŋoqnsim unum. Laŋ bunuj ti mandam bunuj ti dia kumbra bole tiŋtiŋ gaigai sqas.

Niŋgi ŋam atoqnsib Tamo Koba Yesus qa tariŋoqnsib soqniye

14 O ijo was bole, niŋgi iŋgi iŋgi di brantqajqa tariŋeqnub deqa niŋgi Qotei aqa ŋamgalaq di tamo bole une saiqoji sqajqa siŋgila na wauoqniye. Osib niŋgi Qotei ombla na areqalo qujaitosib soqniye. Soqnibqa mondoŋ Tamo Koba Kristus a olo bqajqa batiamqa Qotei a nuŋgo kumbra bole kalil di unekritqas. 15 Tamo Koba Yesus a jiŋga na iga qa tariŋeqnu. Deqa niŋgi endegsi poiŋgem. Yesus a na iga eleŋqajqa deqa iga qa tariŋeqnu. Qotei a na gago was bole Pol powo yonaqa a dego anjam deqaji neŋgreŋyoqnsiq niŋgi qa qariŋyoqnej. 16 Pol a diŋo bati qa anjam di gaigai neŋgreŋyoqnej. Bole, aqa anjam qudei aqa damu iga poigwajqa wau koba. Deqa nanari tamo naŋgi Kristus qa naŋgo areqalo siŋgilaboletosai qaji naŋgi Pol aqa anjam di bulbulyoqnsibqa ugeugeiyeqnub. Osib Qotei aqa anjam kalil neŋgreŋq di unu qaji di dego degsib ugeugeiyeqnub. Deqa mondoŋ tamo naŋgi di tulaŋ padalougetqab.

17 O ijo was bole, niŋgi diŋo bati qa anjam di bole qalieonub deqa niŋgi geregere ŋam atoqniye. Niŋgi ŋam atqasai di dal anjam gotraŋyo qaji tamo naŋgi bosib niŋgi gisaŋgosib titŋgibqa niŋgi siŋgila na tigelesqa uratosib uloŋo uge. 18 Gago Tamo Koba Yesus Kristus agi iga eleŋej qaji a niŋgi qa are boleiyeqnu. Niŋgi a qa bole qalieonub. Ariya a niŋgi qa are boleiyeqnu aqa kumbra dena niŋgi olo siŋgilatŋgimqa niŋgi aqaq dena qalie koba oqniye. Kristus a ñam koba ti unu deqa iga bini bati endeqa aqa ñam soqtoqnqom. Osim bati gaigai aqa ñam soqtoqnsim sqom. Bole.